समुदायको पहलबाट सुरु भएको शैक्षिक यात्रा
पशुपति माध्यमिक विद्यालय धादिङ जिल्लाको नीलकण्ठ नगरपालिका–१२, दामगाडेमा अवस्थित एक सामुदायिक शैक्षिक संस्था हो। स्थानीय रूपमा अवस्थित हिन्दुहरूको आराध्यदेव भगवान् पशुपतिनाथ मन्दिरको नामबाट यस विद्यालयको नामकरण गरिएको हो।
स्थानीय बालबालिकालाई आफ्नै गाउँमा गुणस्तरीय शिक्षा प्रदान गर्ने उद्देश्यले स्थानीय समाजसेवी, शिक्षाप्रेमी तथा बुद्धिजीवीहरूको सक्रिय पहलमा वि.सं. २०४५ साल माघ २७ गते विद्यालयको औपचारिक स्थापना भएको हो। यसअघि वि.सं. २०४४ सालदेखि चौतारामा अनौपचारिक रूपमा सञ्चालन हुँदै आएको पठनपाठनलाई संस्थागत रूप दिँदै विद्यालय स्थापना गरिएको अभिलेखमा उल्लेख छ।
विद्यालय स्थापनामा हर्कबहादुर भण्डारी, छविलाल श्रेष्ठ, ताराबहादुर राउत, भोजनारायण श्रेष्ठ, रामचन्द्र कुमाल, तेजबहादुर अधिकारी, भक्तबहादुर राउत, जीतबहादुर दमाई, चन्द्रकान्त दुवाडी, यदुकुमार दुवाडी, स्वर्गीय रामचन्द्र भण्डारी, होमनारायण श्रेष्ठ, स्वर्गीय भिमसेनकुमार श्रेष्ठ, गोकर्णप्रसाद सापकोटा लगायतका अग्रज व्यक्तित्वहरूको उल्लेखनीय योगदान रहेको छ।
हाल यस विद्यालयमा बालविकासदेखि कक्षा १२ सम्म नियमित पठनपाठन सञ्चालन भइरहेको छ। गुणस्तरीय, समावेशी तथा जीवनोपयोगी शिक्षामार्फत सक्षम, नैतिक, अनुशासित र जिम्मेवार नागरिक उत्पादन गर्ने लक्ष्यका साथ विद्यालय निरन्तर शैक्षिक उत्कृष्टताको यात्रामा अग्रसर रहेको छ।